كلاكيت مرة ثانية !

بعد اشهر قليلة من ولادتي اكتشفت ان السيناريو تكرر مرة ثانية وصرت حاااااااامل ! . اتذكر زين لما كنت مع صديقاتي في احد مطاعم شارع الخليج اتصلت علي امي وسالتني شاللي مضيق خلقج ؟ لاشعوريا ماقدرت امسك دموعي وقعدت اصيح جدام الله وخلقه (الحمدلله والشكر موصاحية) واقولها انا حامل ! . طبعا امي اقعدت تهديني وتقولي تحمدي ربج ، وهذي نعمة ، وصلي ركعتين شكر ومن هالكلام . بحملي الاول امي مافرحت وايد يمكن لانها ماستوعبت الموضوع وبسرعة تم هالشي بس بحملي الثاني كانت طايرة بالحمل خصوصا لما عرفت ان الجنين (بنت) . ماقصرت الوالدة ربت بنتي (عارفة انا مالي خلق اربي) وردتلي البنت واهي حليوة . بعد ولادتي في بنتي جسمي ما مداه يسترد رونقه مثل الاول فقررت اني افاجأ الكل واسوي ريجيم قاسي ضعفت من خلاله فوق ال ٣٠ كيلو ، على اثره حذفت كل هدومي القديمة بالزبالة (حسافة) ، وغيرت سيارتي (شكو مادري) و هالشي خلاني استرد ثقتي بنفسي وبشكلي ، خصوصا انه قضى على عقدة (ريلي شكله اصغر مني) وخلا الكل يقولي ريلج عوووود جم بينج وبينه ؟ ( طبعا وانا مستانسه)

Finally .. Done !

احيانا اكون قبسة .. يعني بالعربي افقر روحي بالحنة ، وهذا بالضبط اللي حصل معاي كنت في اواخر ايام النفاس وطبعا كان الاكتئاب في اشد حالاته عندي ، فاجئني زوجي بتذاكر السفر لاحد الجزر اللي كنت اتمنى اعسل فيها وماحصل لي ، طبعا استانست جني خبلة الحمدلله والشكر ، وبدت الكئابة تتلاشى شوي شوي . بعز الفرحة تذكرت اهم شي وهو الجوازات وفعلا من حظي الردي طلعت الجوازات منتهية فكرهت الريال وولده وكرهت نفسي بعد ، وحطيت حرتي بالياهل المسكين لين ما امي الله يحفظها زخته مني .. (ولدي الحين كبر اسم الله عليه وصار ريال) . بظرف ايام جددنا الجوازات وبالاخير .. سااااافرنااااااااا . واخيرا تحقق حلمي وقعدنا حدر نخلة عوية نشرب عصير جوز الهند ولابسين كبابيس قش ، اشكالنا طبعا كانت مسخرة بس هم ميخالف (حاجة في نفس يعقوب قضاها) . من جم يوم قعدنا انا وزوجي نشوف البوماتنا القديمة وطلع بالصدفة البوم شهر العسل ، اكتشفت ان شكلي كان يضحك وقمة في المتن والشعر كشة وكنت طول الصور اضحك مادري على شنو !! .. تنرفزت وعصبت على ريلي وقلتله شلون مخليني وشكلي جذي ! ويمكن اللي خلاني اعصب ان شكله بالصور صغير وانا شكلي امه! . قالي انتي بكل حالاتج حلوة ، وهالشي زود اعصابي لان هالكلام يخليني اعرف شكثر كان متحمل وساكت :(

شارك في الاستطلاع عن رأيك في المدونة على هامش الصفحة .. مع الشكر

كاريكاتير عجبني

طفلي العزيز مع التحية

فترة الحمل : هي الفترة التي تنتقل فيها السيدة من غزالة الى فيلة , خصوصا باخر الاشهر تتحول الوحدة الى مخلوق غريب تحاول بصعوبة ان تتعايش مع شكلها , ونفسيتها .. (وهذا بالضبط اللي حصل معاي) . خلال هالتسع اشهر مريت بعدة مراحل كالاتي : اولا مرحلة الصدمة من الحمل , ثانيا مرحلة التكيف مع الحمل , ثالثا مرحلة الصدمة من شكلي ! .. رشاقتي من الخطوط الحمرا اللي مااتجاوزها , حتى لو اوصل مرحلة استخدام الاساليب الخطأ او المرضيه علشان احافظ عليها , لكن طبعا اكتشفت ان الحمل له احكامه الاخرى .. ماانكر اني تدلعت نوعا ما , خصوصا لما اكتشفنا بوقت مبكر جدا من الحمل ان الجنين (ولد) ! لاسيما من حمولتي اللي يقدسون الذكورة اكثر من الانوثة باعتبار ان البنت (عوبة) و (بنت على بنت ولا قاعدات بطالي) , اما والدتي فكان لها راي مختلف واصلا مااذكر انها فرحت في حمالي بكبره ! .. ولدت اخيرا ولكن قبل اواني , كانت المشاعر مختلطة بين فرح ودهشة خصوصا لما شلته اول مرة , فاكتشفت انه طول الريموت كنترول وان ثلاث ارباع المهاد فاضي ! .. كان طفل مخيف .

من اول يوم من النفاس بديت استوعب اني تزوجت رجل كويتي بمعنى الكلمة . مااقدر اقول انه قصر معاي خلال هالفترة , لكن حبه لولده كان اكبر . وكانت زياراته لي بالواقع علشان خاطر الولد (وهذا طبيعي) , لكن الشي اللي مستحيل  انساه اني مريت بفترة اكتئاب غير طبيعية , فكرت خلالها انتحر وارتاح من هالمسؤولية , وطول الليل احاسب نفسي وشلون ارتكبت هالخطأ الفادح وحملت بالاساس وشلون فرطت بحريتي بهالسهولة ! وكل ماالتفت عالولد الاقيه يبجي واقعد ابجي وياه :(

فوق الاكتئاب اللي انا فيه اكتشفت سلسله من الاكاذيب اللي كان يمارسها علي زوجي علشان ارضى ! وطبعا هالشي خلاني متوترة في فترة النفاس , لا من الولد ولا من ابوه , فاكتشفت اني بالواقع اربي طفلين !

عزائي الوحيد ان زوجي مثل البيبي اللي يزعل بسرعه ويرضى بسرعه ويبجي بسرعه , عجيب ! فقررت اتقبل هذا الامر واتعلم على طبعه الى ان اتقن اللعبه (على قولة المرحوم نزار قباني) ..

عسل اسود

بما اني مهووسة بالسفر , فقررنا انا وزوجي نسافر لاحدى الجزر بالمناطق الاستوائية , ونحجز جزيرة بروحنا , ونقعد مع بعض تحت ظل نخلة عوية , ونستمتع بالميه والهوا (مادري رشدي اباظة وفاتن حمامة) .. المشكلة كنا خبول لان زواجنا بالصيف بعز الحر وبنروح ديره هم حاره ! (قرادة) . اتفقنا بعد العرس نحجز ليلتين بفندق على ما نضبط اجراءات السفر .. بس ماكنت ادري ان شهر عسلي بيكون بدولة الكويت وضواحيها ! لا والمشكلة ان اول ليلة واحنا نتمشى بالفندق ولا يوقفونا المباحث مشتبهين فينا ! طبعا زوجي عطاهم عقد الزواج واهو معصب ومالقيت روحي الا وانا وقشي بالشارع انطر السيارة علشان نتوكل على الله :(
طبعا تعوذت من بليس وقلت هذي عين ماصلت على النبي (كلام ماخوذ خيره) , سكت طبعا ورحنا فندق ثاني بنص الليل ويالله لقينا حجز , يعني باختصار (تبهذلت) . بما اني احب المشي , ظليت امشي بالفندق مسافات طويلة علشان افكر بهدوء , بس كنت احس اني مو طبيعية .. اخرتها طلعت حامل ! (مو وقته)
مشكلتي ان كلامي غير افعالي , اللي تاخذ رايي بالرياييل اشتط وانفعل و اقولها لالالالالازم تعرفينه قبل وتثقين فيه ولي ضمنتيه حملي ! (مالت عالباميه) طلعت انا بعرسي حامل :-x  طبعا لا سفر ولا بطيخ , ماردي طلعت من الفندق بوليلة الى بيت الحمولة ..

بداية الألف ميل .. حلم

الاوادم تورث حق عيالها فلوس , ذهب , بيوت , عقارات , انا امي (الله يحفظها) ورثتلي موهبه الاحلام (ساحرة مو ادمية) , يعني اي شي ابي اعرف مكانة ماعلي الا اني انام واحلم فيه واكيد الاقيه , او اشوف اماكن معينة وبالمستقبل ادخلها .. الناس تقولي انتي تخرعين بس انا ماحب اعطي هالموضوع اهمية كبيرة عندي .. الا اذا الموضوع فيه بيزات , فاكيد اناجر ريلي واقوله جم دش برصيدك هاليومين , مسكين يتدوده , خصوصا لما اعطيه النظره الشريرة علشان مايحاول يجذب علي !

وانا كتكوتة صغيرة حلمت اني بالوكالة محتارة بين سيارتين وحدة سماوية ووحدة خضرا , ماهقيت اني عقب جم سنة راح اشتري السيارة الزرقا ويخطبني ويتزوجني راعي السيارة الخضرا ! .. خطوبتي سريعة وموافقتي عليه كانت بلحظة غضب وانا امشي بالممر بالدوام رايحة ورادة علشان اضعف والجو غيظ والوالدة تحن فوق راسي بالتلفون , فقررت اقول اي علشان افتك من حنتها !

بصراحة امي حست بالذنب فخذتني وسفرتني بره (يالله من فضلك) علشان افكر بهدوء , طبعا انا نسيته وقعدت استمتع بالمناظر والروحات والردات والمهايل بالسوقه .. بس الصدمة اني بعد مارجعت باسبوع ملجتي !

بصراحة تدلعت , حفلتين كل وحدة احسن من الثانية وحدة ملجة والثانية عرس بفندق , ومن الشفاحة لبست ابيض مرتين .. هذا اللي ماتبخر تبخر واحترق .. ماعطيت روحي مجال اعرفه ! اعترف ان زوجي ما كان بمستوى طموحاتي ابدااا .. كنت اتمنى شخص افضل شهادة ووسامة , بس هذا النصيب والحمدلله .. (مادري باريس هيلتون) .. طبعا هذا الكلام مأخوذ خيره لان لو يعيد فيني الزمان راح اكيد ارجع واختاره (احتمال يعني مو اكيد) :)

مرتبة شرف

بما اني البكر .. فامي وابوي يطالعون الله ويطالعوني (مادري !) .. فلازم اسمع الكلام واصير شطورة والحمدلله كان لهم ذلك .. بس العلة فيني انا .. متمردة وكنت اسبب بعض المشاكل لاهلي الى ان دخلت الكلية بتخصص لا عالبال ولا عالخاطر بس كعادتي اسلك باي وضع اكون فيه .. مااحب التغيير على الرغم من ان برجي مائي !! .. احب اكمل الشي للاخر .
بالجامعة كنت اتمنى اتزوج باسرع وقت ممكن (خبلة) لكن لما تخرجت واشتغلت صارت طموحاتي اكبر .. لكن بالنهاية ماردي انقردت قصدي تزوجت .. حرام زوجي طيب وحبوب , بس كله مو عاجبني العجب .. لكني اهني انا اعترف ان مساحة الحرية اللي عندي الحين تخليني مستحيل ارجع بيت اهلي مرة ثانية ! .. اهم شي لما تزوجت , امي استانست وكأن حمل وانزاح من ظهرها مسكينة , مو علشان انا مأذيتها لا بس علشان انا كبرت وصار صعب السيطرة علي خصوصا وان احلامي تعدت النطاق المحلي وصارت طموحاتي اقليمية (بالسفر والدراسة) .
بيت اهلي هو المكان اللي عشت فيه 25 سنة يعني مؤبد , بس الحين مااقدر اطول فيه 25 دقيقة ! شي غريب ان انتمائي لبيتي اقوى من انتمائي لبيت اهلي على الرغم من اني سكنت بيتي من 4 سنوات فقط ! بس ايضا السبب الاساسي هو التغييرات اللي صارت يعني احنا يا الكويتيين مانرتاح اذا ماغيرنا الديكورات كل سنة , وهالشي يضيع ذكرياتنا معاه .. بس عموما انا ماعادت عندي ذاكرة , مع الحمال والولادة والعمليات المتكررة احس بالخداي المستمر والنسيان المتكرر لدرجة احيانا احس اني (بقرة) مالي لازمة بالدنيا !

بسم الله

على خطى العظماء قررت اسوي مدونة وادون يومياتي الفاضية عل وعسى احد يكتشفها ويسويها مسلسل ويشتريها مني بملايين الدنانيرههههه .. طبعا كلش مو هذا حلمي .. احلامي كانت وايد بس مع تقادم العمر بدت تضمحل الى ان تكاد تصير (يالله حسن الخاتمة) على الرغم من اني احاول بقدر الامكان ان احفر بالصخر واحقق اشياء وانا صغيرة كنت اتمناها , بس دائما كان الحظ يمشي wrong side معاي , مع ان الكل حوالي يقول اني محظوظة , لكن انا مثل غيري ابي امتلك الاشياء اللي مو عندي حتى لو ما كان الوقت ولا المكان ولا الزمان مناسب .